جرنان الخميس

جرنان الخميس
من أجلك أنت.. جبت جرنان الخميس..
قلت أشوف البخت يمكن.. يتنصف مرة التعيس..
أصل أنا اتخصخصت بدرى.. والزمن ده أسود غطيس..
بس لأجل الحق برضك.. حظى مع فول الدميس
والرغيف معركته سهلة.. لو ما يحماش الوطيس..
أيوه يا مصر إنت غالية.. بس إنسانك رخيص..
فجأة بأقلب ف الجريدة.. شفتلك «مطلوب رئيس»..
قلت مش ممكن ح يحصل.. حتى لو.. طب والعريس..
ده المسائل باينة جداً.. شكلها بترسم وريث..
ولا عايزين حد يعنى.. حبتين يتحط ميس؟..
قلت كمل تانى واقرأ.. يمكن الإعلان دسيس..
برضو مش مطلوبة خبرة.. أو مؤهل قلت هيص..
قلت جمد يلا قلبك.. واترسم واكوى القميص..
ده أنت شاعر برضو جامد.. يعنى من معدن نفيس..
يلا خد رزمة قصايدك.. حطها ف عين الجعيص..
وأنت فيك إيه رح يعيبك.. بس برضو كن حريص..
لـ المسائل تنتهيبك.. وأنت ف أقسام البوليس..
قلت أشاور صاحبى قاللى.. إتلهى خليك حسيس..
أنت ح تخرف يا شاعر.. بص شوف نفسك وقيس..
ده أنت لو تمنت نفسك.. تسوى كيلو خيار ف كيس..
بص للإعلان وقاللى.. حتى مش بتشوف بصيص!.
. ده الكلام عنوانه متنى.. آخرتك ح تروح فطيس..
طب رئيس مكتوبة فعلاً.. بس شيطانك خسيس..
دهولك خلاك قريتها.. ناقصة كلمة «للأوفيس»